Se as cámaras de televisión non perdoan, na era do Youtube menos aínda, por máis presidente da Xunta que un sexa. Grazas a Chuza! soubemos dun blogueiro que pillou a Touriño esforzándose en cantar a segunda parte do himno sen saber moi ben que frases eran as que seguían a "cumprido fin terán". Foi no acto da Véspera celebrado o luns pasado na residencia oficial de Monte Pío, xusto no momento en que se izaba a bandeira galega ao compás do himno interpretado polas cantareiras de Leilía. No momento -tardío- no que o enfocan as cámaras, o presidente da Xunta move os beizos como pode baixo a ollada da súa muller, que tampouco o ten moi claro, e acompañado polo alcalde de Santiago, que para aforrar problemas non abre a boca. Se a Emilio Pérez Touriño lle volve acordar a letra cando toca o "nazón de Breogán" tampouco o sabemos pois as cámaras da TVG volven enfocar a bandeira cunha panorámica da casa do presidente e da catedral, nun acto concebido para a exaltación simbólica do país e de "encontro do presidente da Xunta co pobo galego".